2017 წლის 13 ნოემბერს საქართველოს სახალხო დამცველმა სასამართლოს მეგობრის მოსაზრებით მიმართა თბილისის საქალაქო სასამართლოს სარჩელთან დაკავშირებით, რომლითაც მოსარჩელე მიუთითებდა, რომ საქართველოს იუსტიციის უმაღლესი საბჭოს გადაწყვეტილებით, მოსამართლის თანამდებობაზე არ დაინიშნა მისი განსხვავებული მოსაზრებების და გაერთიანებისადმი კუთვნილების გამო.

საქართველოს მართლმსაჯულებისთვის ამ საკითხის მნიშვნელობის გათვალისწინებით, სახალხო დამცველმა მიიღო სასამართლოს მეგობრის წარდგენის გადაწყვეტილება. აღნიშნული დოკუმენტით, საქართველოს საკონსტიტუციო სასამართლოს და საერთაშორისო ინსტიტუტების მიერ დადგენილი სტანდარტების საფუძველზე, სახალხო დამცველმა წარმოადგინა გაერთიანების წევრობის და განსხვავებული შეხედულებების და მოსაზრებების გამოხატვის ნიშნით დისკრიმინაციის ფაქტის გამოვლენის ტესტი, ასევე ყურადღება გაამახვილა დისკრიმინაციასთან დაკავშირებულ საქმეებში მხარეებს შორის მტკიცების ტვირთის გადანაწილების საკითხზე.

მოსარჩელის ინტერესებს ააიპ „ადამიანის უფლებების სწავლებისა და მონიტორინგის ცენტრი (EMC)“ და ააიპ „საქართველოს ახალგაზრდა იურისტთა ასოციაცია“ წარმოადგენს.