2023 წლის 21 ნოემბერს საქართველოს სახალხო დამცველი ლევან იოსელიანი საოკუპაციო ხაზთან მდებარე სოფელ კირბალში იმყოფებოდა, სადაც ლევან დათიაშვილს და თამაზ გინტურის ოჯახის წევრებს შეხვდა. სახალხო დამცველი დაინტერესდა გამოძიების მიმდინარეობის პროცესში საგამოძიებო უწყებებისა და ადგილობრივი მუნიციპალური სამსახურების ჩართულობით; ასევე, სოფლის მაცხოვრებელთა უსაფრთხოების მდგომარეობით და მადლობა გადაუხადა ადგილობრივ საპატრულო პოლიციას 24 საათიანი პატრულირებისთვის.

მოგვიანებით, სახალხო დამცველი ნიქოზში ჩავიდა სოფლის მოსახლეობასთან შესახვედრად. სოფელში ასევე იმყოფებოდნენ გაეროს მუდმივი კოორდინატორი საქართველოში საბინე მახლი და გაეროს გენერალური მდივნის თანაშემწე ევროპის, ცენტრალური აზიის და ამერიკის საკითხებში მიროსლავ იენჩა. მხარეებმა ხანმოკლე შეხვედრისას საქართველოს ოკუპირებული ტერიტორიების მიმდებარედ მცხოვრები მოსახლეობის უსაფრთხოების საკითხებზე ისაუბრეს.

სახალხო დამცველი ცხინვალი-ნიქოზის ეპარქიის მიტროპოლიტს მეუფე ესაიას ეწვია და მასთან ერთად დაათვალიერა ნიქოზის ხელოვნების სკოლა.