Սոցցանցում տարածված տեղեկատվության հիման վրա Վրաստանի Ժողովրդական պաշտպանի գրասենյակը սկսել է ուսումնասիրել «Արենա» մարզահամալիրի կողմից հաշմանդամության հիմքով ենթադրյալ խտրական վերաբերմունքի փաստը։

Ինչպես հայտնի դարձավ, հաշմանդամություն ունեցող անձին մերժել են մուտք գործել «Արենա 1» համալիրի լողավազան, իսկ ծնողին բացատրել են, որ երբ հաշմանդամություն չունեցող երեխաներն օգտվում են «Արենա 1» լողավազանից, հաշմանդամություն ունեցող երեխաների համար հատկացված է «Արենա 2» լողավազանը, որը գտնվում է վերանորոգման փուլում։

Ցավոք, հաշմանդամություն ունեցող անձանց խտրականության հիմքը հիմնականում Վրաստանում խիստ խարանն ու կարծրատիպային վերաբերմունքն է հաշմանդամություն ունեցող անձանց, այդ թվում՝ երեխաների նկատմամբ, ինչպես նաև ծառայությունների և շրջակա միջավայրի հասանելիության խոչընդոտները: Նշենք, որ վաղ տարիքից հաշմանդամ երեխայի ինտեգրմանը հասարակությանը նպաստելը անհրաժեշտ է նրա իրավունքները պաշտպանելու և հասարակական կյանքին լիարժեք ինտեգրելու համար։

Բացի այդ, շատ դեպքերում սպորտային միջոցառումներին մասնակցելը հաշմանդամություն ունեցող երեխայի համար վերականգնողական գործառույթ ունի և կարևոր է հավասար պայմաններում նրա զարգացումն ապահովելու համար։

Ժողովրդական պաշտպանը «Խտրականության բոլոր ձևերի վերացման մասին» օրենքով սահմանված լիազորությունների շրջանակում իր նախաձեռնությամբ ուսումնասիրում է նշված փաստը և ուսումնասիրության արդյունքների մասին լրացուցիչ տեղեկացնում հանրությանը։