Վրաստանի Ժողովրդական պաշտպանն այսօր արձագանքում է Վրաստանի խորհրդարանի կողմից «Օտարերկրյա ազդեցության թափանցիկության մասին» Վրաստանի օրենքի երրորդ ընթերցմամբ ընդունման գործընթացին և ևս մեկ անգամ պարզաբանում է, որ եթե նպատակը Վրաստանի համար հատկացված արտաքին օգնության հոսքերի թափանցիկությունը և ընդունող կազմակերպությունների հաշվետվողականության բարձրացումը, նշված նպատակին կարելի է հասնել ներկայացված օրենքի նախագծով կամ գործող օրենսդրության մեջ փոփոխություններ մտցնելով, որոնց վերաբերյալ Ժողովրդական պաշտպանը հանրությանը հանգամանալից ներկայացրել է իր հրապարակային դիրքորոշումը այս տարվա ապրիլի 11-ին։

Ժողովրդական պաշտպանը ընդգծում է, որ Վրաստանի խորհրդարանի կողմից ընդունված բոլոր օրենքները պետք է համահունչ լինեն մեր եվրոպական նկրտումներին, չպետք է վնասեն գործընկերների հետ հարաբերություններին և մեր երկրի եվրաինտեգրման գործընթացին։

Խնդրահարույց են թե՛ օրենքի նախագծի վերնագիրը, թե՛ նախագծում տեղ գտած մի շարք գրառումներ, որոնք կարող են վիրավորանք դառնալ օրենքի հասցեատերերի համար։ Բացի այդ, նախագիծն իր մեջ կրում է քաղաքացիների մասին մեծ քանակությամբ անձնական տվյալների հավաքման և բացահայտման վտանգ, ինչը հիմք է ստեղծում գաղտնիության իրավունքի խախտման համար։

Նշենք, որ օրենքի նախագծի քննարկումն ընթանում է մեր քաղաքացիների գրեթե մեկ ամիս շարունակվող բողոքի ֆոնին։

Ելնելով վերոգրյալից՝ Վրաստանի Ժողովրդական պաշտպանը ևս մեկ անգամ կոչ է անում Վրաստանի խորհրդարանին հասնել թափանցիկության նպատակին՝ փոփոխություններ կատարելով ներկայացված օրինագծում կամ գործող օրենսդրությունում և հրաժարվել «Արտաքին ազդեցության թափանցիկության մասին» այսպիսի տեսքով օրենքի ընդունումից: