Վրաստանի Ժողովրդական պաշտպանը արձագանքում և բացասաբար է գնահատում Վրաստանի խորհրդարանում նախաձեռնված օրենքի նախագիծը, որի նպատակն է վերացնել գենդերային քվոտաները՝ փոփոխություններ կատարելով Վրաստանի օրգանական օրենքում՝ «Վրաստանի ընտրական օրենսգրքում»։

Այս փոփոխությունները հատկապես ուշագրավ են այն հանգամանքի լույսի ներքո, որ, ի տարբերություն նշվածի, 2022 թվականին Վրաստանի խորհրդարանը աջակցեց գենդերային քվոտաների երկարաձգմանը մինչև 2032 թվականը և դրանով իսկ հստակ ընդգծեց կանանց քաղաքական մասնակցության կարևորությունը և համապատասխան անհրաժեշտ միջոցառումների իրականացումը կանանց ներգրավվածությունը բարձրացնելու համար:

Գենդերային քվոտայի մեխանիզմը կանանց տրվող արտոնություն չէ, այլ կարևոր գործիք՝ կանանց նկատմամբ խտրական վերաբերմունքը վերացնելու, կարծրատիպերի դեմ պայքարելու և միջազգայնորեն ընդունված պարտավորությունները կատարելու համար:

Կանայք ամեն օր բախվում են անտեսանելի խոչընդոտների, որոնք հնարավոր է վերացնել և երկրում էական հավասարության հասնել՝ բարելավելով պարտադիր գենդերային քվոտայի համամասնությունը և իրականացնելով այլ աջակցող միջոցառումներ: Նախատեսվող օրենսդրական փոփոխություններով մենք անտեսում ենք կանանց երկարամյա պայքարի արդյունքները և վատթարացնում հավասարության հասնելու գործող մեխանիզմները։

Երկրի ժողովրդավարական զարգացման համար անհրաժեշտ է, որ կանանց ձայնը հստակ լսվի երկրի օրենսդիր մարմնում և քաղաքականություն մշակող այլ մարմիններում, որպեսզի օրակարգում լինեն կանանց կարիքներն ու գենդերային հավասարությունը խթանող միջոցառումները: