2022 թվականի դեկտեմբերի 29-ին Վրաստանի Ժողովրդական պաշտպանը դիմել է «Հոգեկան առողջության և թմրամոլության կանխարգելման կենտրոն» ՍՊԸ-ի տնօրենին՝ գործունեության ձևի հիման վրա անուղղակի խտրականությունը վերացնելու հանձնարարականով։

Ինչպես պարզվեց դեպքի ուսումնասիրությունից, Հոգեկան առողջության և թմրամոլության կանխարգելման կենտրոնի հաստատված պրակտիկան սահմանափակում է ինքնազբաղված անձանց՝ օգտվելու դեղորայք ընդունելու բացառիկ հնարավորությունից, մինչդեռ պաշտոնապես աշխատող անձանց թույլատրվում է ընդունել դեղորայքը: Ճկուն մեխանիզմների բացակայության պատճառով անբարենպաստ իրավիճակում կարող են հայտնվել այն անձինք, ովքեր ստիպված են երկրի ներսում տեղափոխվել ոչ թե աշխատանքի, այլ անձնական պատճառներով։

Ժողովրդական պաշտպանը գտնում է, որ բուժման շարունակականության հետ մեկտեղ ապրուստի միջոցը հավասարապես կարևոր է ինչպես ֆորմալ ոլորտում, այնպես էլ ինքնազբաղվածների համար։ Հանձնարարականում ընդգծվում է, որ ինքնազբաղված հասկացությունը ճանաչված է ինչպես միջազգային չափանիշներով, այնպես էլ ազգային օրենսդրությամբ: Բացի այդ, կորոնավիրուսի համավարակի ժամանակաշրջանում պետությունը գիտակցել է ինքնազբաղված անձանց եկամուտներ չստանալու հետևանքով առաջացած խնդիրների հաղթահարման կարևորությունը և երկրում ինքնազբաղվածության փաստը հաստատելու տեսանկյունից արդեն կուտակվել է որոշակի փորձ:

Վրաստանի Ժողովրդական պաշտպանն իր հանձնարարականում խնդրել է ներդնել ճկուն մեխանիզմներ և քննարկել երկրի ներսում տեղաշարժի այլ հարգելի դեպքեր՝ ապահովելու ինքնազբաղված անձանց դեղորայք ընդունելու իրավունքի հասանելիությունը։