Hazırkı hesabatda Gürcüstanın Xalq Müdafiəçisi Aparatı tərəfindən Qadınlar, Sülh və Təhlükəsizlik üzrə 2022-2024-cü illər üçün Milli Fəaliyyət Planının icrasının monitorinqinin nəticələri təqdim olunur. Monitorinqin məqsədi Fəaliyyət Planı ilə üzərinə götürülmüş öhdəliklərin icrasını qiymətləndirmək, mövcud çatışmazlıqları və problemləri müəyyən etmək olub.

Monitorinqin nəticələri göstərir ki, BMT Təhlükəsizlik Şurasının qətnamələrinin icrası istiqamətində həyata keçirilən tədbirlər əsasən departamentdaxili fəaliyyətlər çərçivəsində həyata keçirilib və məcburi köçkün və münaqişələrdən zərər çəkmiş qadın və gənclərin həyat keyfiyyətinə müsbət təsir göstərməyib.

Sülh, təhlükəsizlik və barışıq proseslərində qadınların bərabər iştirakı Gürcüstanda həm yerli, həm də beynəlxalq səviyyədə problem olaraq qalır.

Münaqişədən təsirlənən qadınlar və gənclər müxtəlif dövlət resurslarına və xidmətlərinə məhdud və/yaxud qeyri-kafi çıxış kimi sosial-iqtisadi problemlərlə üzləşməkdə davam edirlər.

Qadınlara qarşı zorakılığın qarşısının alınması və onlara reaksiya vermə mexanizmləri daha effektiv olub, lakin maarifləndirmə işinə ehtiyac aktual olaraq qalır. Zorakılığın qurbanı olan qadınlar çox vaxt xidmətlər haqqında kifayət qədər məlumatdan məhrumdurlar. Stereotipik baxışlar və hüquq-mühafizə orqanlarına inamsızlıq problem olaraq qalır ki, bu da dəstək almağı çətinləşdirir.

Ümid edirik ki, hazırlanmış tövsiyələr Milli Fəaliyyət Planını həyata keçirən qurumlara növbəti Milli Fəaliyyət Planını hazırlamağa və onun icrasının səmərəliliyini artırmağa kömək edəcək.