Xalq Müdafiəçisi yanında dini və etnik azlıqlar şuralarının növbədənkənar bəyanatı

2 Mart, 2023

Xalq Müdafiəçisi yanında Dinlər və Etnik Azlıqlar Şuraları Gürcüstan parlamentində bütün vətəndaş cəmiyyətini gözdən salmaq və ona düşmənçilik mühiti yaratmaq məqsədi daşıyan qanunvericilik prosesindən hədsiz narahatlığını bildirir.

Təqdim olunan qanun layihəsi Gürcüstan vətəndaşlarının Avro-Atlantik strukturlara inteqrasiya ilə bağlı ifadə etdikləri sarsılmaz iradəyə, Gürcüstan Konstitusiyasında bəyan edilmiş məqsədlərə və insan hüquqlarına ziddir. Onun qəbul edilməsi narahatedici və ölkənin demokratik inkişafı üçün dağıdıcı olacaq.

Təşəbbüs edilmiş qanun layihəsində vətəndaş cəmiyyəti təşkilatları, media, xeyriyyə və hətta dini birliklər “xarici təsir agentləri” elan edilir və onların bütün fəaliyyəti və cəmiyyətdəki rolu aşağılanır.

Sözügedən qanun layihəsinin və ya buna bənzər təşəbbüsün qanuna çevrilməməsi prinsipial olaraq vacibdir. Xarici Təsir Agentləri Aktını istənilən formada qəbul etmək bütün ölkə üçün son dərəcə zərərli olardı.

Qanunun qəbulu birbaşa olaraq eyni vaxtda bir neçə hüququn, yəni ifadə azadlığının, birləşmək azadlığının, dini etiqad azadlığının, şəxsi həyatın toxunulmazlığının pozulmasına gətirib çıxaracaq.

Qanun xeyriyyə, sosial, humanitar, təhsil, elmi-tədqiqat, səhiyyə, mədəniyyət, idman, ekologiya, kənd təsərrüfatının inkişafı layihələrinin, habelə dövlət və ya ictimai əhəmiyyətli proqramların həyata keçirilməsinə mane olacaq, vətəndaş cəmiyyəti təşkilatlarının benefisiarlarına ziyan vuracaq.

Xüsusilə vurğulanır ki, “Xarici agentlər” qanun layihəsinin qəbulu (istənilən formada) vətəndaş inteqrasiyasının bütün prosesinə və tolerantlıq mədəniyyətinin inkişafına ciddi zərbə vuracaq.

Ona görə də biz “xarici təsir agentləri” haqqında qanunun qəbulunu yolverilməz hesab edirik!

Dinlər Şürası