Milli Preventiv Mexanizmin hesabatında ötənilki tövsiyələrin icra vəziyyətinin qiymətləndirilməsi ilə yanaşı, Xüsusi Preventiv Qrup tərəfindən il ərzində həyata keçirilən profilaktik başçəkmələrin nəticələri təqdim edilib, penitensiar müəssisələrdə, Daxili İşlər Nazirliyinin tabeliyində olan orqanlarda, kiçik ailə tipli evlərdə və məhdud imkanlı şəxslərin hüquqlarının müdafiəsi evlərində işgəncə və pis rəftarla bağlı mövcud vəziyyət nəzərdən keçirilir.

Bundan əlavə, hesabat dövlət siyasətinin və qanunvericiliyin təhlilini təqdim edir və İşgəncə və digər qəddar, qeyri-insani və ya ləyaqəti alçaldan rəftar və ya cəzaya qarşı Konvensiyanın Fakültativ Protokolundan irəli gələn öhdəliklərin icrasını qiymətləndirir.

Milli Preventiv Mexanizmin vəzifəsi işgəncənin qarşısının alınması üzrə qlobal sistemin bir hissəsi kimi işgəncə və digər qəddar, qeyri-insani və ya ləyaqəti alçaldan rəftar və ya cəza üçün risk faktorlarını müəyyən etmək və onların aradan qaldırılması üçün tövsiyələr hazırlamaqdır.

Milli Preventiv Mexanizmin 2024-cü il hesabatı Gürcüstanda həbs, azadlıqdan məhrumetmə və digər məhdudiyyətlər yerlərində insan hüquqlarının müdafiəsi vəziyyətinin qiymətləndirilməsi üçün mühüm sənəddir.