რეკომენდაციები.

სახალხო დამცველის მიმართვა მთავარ პროკურორს გაზეთ „ბათუმელების“ საქმესთან დაკავშირებით

,,საქართველოს სახალხო დამცველის შესახებ“ საქართველოს ორგანული კანონის თანახმად, საქართველოს სახალხო დამცველი მიმართვას საქართველოს მთავარ პროკურორს შეისწავლოს გაზეთ „ბათუმელების“ წარმომადგენლების მიერ მიწოდებული ინფორმაცია, საქმეზე ჭეშმარიტებისა და ეფექტური შედეგის დადგომის მიზნით.

2011 წლის 20 ნოემბერს, გაზეთ ,,ბათუმელების” ინფორმაციით, გაზეთის დირექტორმა ქალბატონმა მზია ამაღლობელმა დაადგინა პიროვნება, რომელიც მათი გაზეთის საგამოძიებო ჯგუფის კოორდინატორს თედო ჯორბენაძეს აშანტაჟებდა. მათ გამოიძახეს საპატრულო პოლიცია, რომელმაც ადგილზე არანაირი წერილობითი დოკუმენტი არ შეადგინა.

აღნიშნულ საკითხთან დაკავშირებით, გაზეთ ,,ბათუმელების” წარმომადგენლებმა განცხადებებით მიმართეს საქართველოს აჭარის ავტონომიური რესპუბლიკის პროკურორს და საქართველოს შინაგან საქმეთა მინისტრს.

მოგეხსენებათ, 2009 წლის 25 ნოემბერს, გაზეთ „ბათუმელების“ ჟურნალისტური გამოძიების კოორდინატორი თედო ჯორბენაძე, უცნობმა პირებმა ქ.ბათუმის, შს განყოფილების შენობაში დაიბარეს. მას თან თანამშრომლები ახლდნენ. აღნიშნულ პირთა განმარტებით, უცნობმა პირებმა თედო ჯორბენაძეს ანახეს შავ–თეთრი ფოტოები, რომლებზეც თითქოს გამოსახული იყო თავად ჟურნალისტი. მოსთხოვეს მეორე დღეს მათთან შეხვედრა წინააღმდეგ შემთხვევაში დაემუქრნენ, სურათებისა და ვიდეოების გასაჯაროებით.

აღნიშნულ საქმეზე 2009 წლის 11 დეკემბერს საქმეზე არსებული მასალის შესწავლის შემდგომ, ,,სახალხო დამცველის შესახებ“ საქართველოს ორგანული კანონის 21–ე მუხლზე დაყრდნობით, სახალხო დამცველმა რეკომენდაციით მიმართა მთავარ პროკურორს და მოითხოვა საქმის შესწავლა. ამ საქმეზე ეფექტური გამოძიების რეკომენდაცია გაიცა ასევე საქართველოს სახალხო დამცველის 2010 წლის საპარლამენტო ანგარიშში.

ჩვენს ხელთ არსებული ოფიციალური კორესპონდენციების თანახმად, 2010 წლის 18 თებერვალს აჭარის ავტონომიური რესპუბლიკის საგამოძიებო ნაწილში დაიწყო წინასწარი გამოძიება, შინაგან საქმეთა სამინისტროს თანამშრომლების მიერ სამსახურეობრივი უფლებამოსილების გადამეტების ფაქტზე, საქართველოს სისხლის სამართლის კოდექსის 333–ე მუხლის პირველი ნაწილით გათვალისწინებული დანაშაულის ნიშნებით.

სამწუხაროდ დღემდე თედო ჯორბენაძის მიმართ განხორციელებული ქმედების ფაქტზე გამოძიება არ არის დასრულებული.

სამუშაო საათები: ორშაბათი–პარასკევი 9:00–18:00
ცხელი ხაზი: 1481 (24/7)
ონლაინ დახმარება